Xan, a despedida (O Blog)

XAN NO MIVICO 2007

2007-09-03T12:33:00.001+03:00

A presentación de "Xan, a despedida" a diversos concursos e festivais comeza a dar os seus froitos e, durante esta pasada semana, o equipo desta curta recibiu varias e boas novas que neste blog iremos desmenuzando pouco a pouco. Como é esta a nosa intención teño que contarvos que a curta ten sido seleccionada para participar na Mostra Internacional de Videocreación de O Condado (MIVICO) que se celebra en Ponteareas. A produción de Contacontos foi seleccionada na categoría de Curtametraxes e, a estas alturas, xa todos agardamos con impaciencia a chegadas dos días 4,5 e 6 de outubro nos que se celebrará este certamen do audiovisual, no auditorio desta localidade pontevedresa. Como dicíamos ao comezo deste post son "varias e boas" as novas recibidas durante a pasada semana pero, polo de agora, só imos a adiantar esta. En breve contaremos algunha novidade máis do camiño desta curta polos festivais e certames. Seguiremos informando.

ÉXITO NA ESTREA PONTEVEDRESA

2007-06-23T13:47:00.000+03:00

Preto de 200 persoas achegáronse onte pola tarde ata o Café Moderno de Pontevedra para ver a estrea da curtamentraxe galega “Xan, a despedida”. A estrea contou coa presencia de boa parte do equipo artístico e técnico que fixo posible esta curtametraxe, así como con Elena Alonso Pino, a “voz” que protagoniza o tema central da banda sonora da curta. Tras a exitosa estrea do filme en Pontevedra, “Xan, a despedida” proxectarase, durante as vindeiras semanas, noutras localidades galegas como Santiago de Compostela, Ourense ou A Coruña. A curta iniciará ademais, nestas mesmas datas, a súa andaina nos circuitos nacionais e internacionais do xénero. En resumo, todo un éxito de estrea que rematou cun caluroso e prolongado aplauso do público asistente tras a proxección da curta.Parabéns a tod@s!

ESTREA EN PONTEVEDRA DE "XAN, A DESPEDIDA"

2007-06-18T13:08:00.001+03:00

O vindeiro venres 22 de xuño o Café Moderno de Pontevedra, situado na Praza de San José número 3 (Sede Fundación Caixa Galicia), acolle a partires das 20:15 horas, a estrea da curtametraxe “Xan, a despedida” da produtora galega Contacontos P.C. A curta, protagonizada polos actores galegos Marcos Correa, Xulio Abonjo e José María Tanas, está rodada integramente na localidade pontevedresa de Toutón (Concello de Mondariz). Estades todos convidados a acudir o venres a ver a estrea da curta.

XA ESTAMOS NO MYSPACE

2007-05-10T18:42:00.000+03:00

Como todos saberedes, o Myspace estase a converter nun fenómeno de masas a nivel mundial na difusión de todo tipo de contidos artísticos. Como non podía ser doutro xeito, no Myspace hai un apartado adicado ao cine e ás producións audiovisuais e é ese o lugar elixido por "Xan, a despedida" para facerse un oco. Dende agora poderedes ver fotografías, videos e outros contidos sobre a curta na dirección: http://www.myspace.com/xanadespedida. Tamén poderedes acceder ao noso Myspace a través do link permanente da sidebar.

XA TEMOS O TRAILER

2007-05-07T19:47:00.000+03:00

A partir de agora xa podedes atopar neste blog adicado ao corto "Xan, a despedida" o trailer do mesmo. Son dous minutos e vinte segundos pero transmiten perfectamente toda a súa intensidade. En breve, o teredes na zona de prensa para descargar no voso equipo pero, polo momento, xa o podedes ver neste voso rincón de internet.

XAN, A DESPEDIDA

2007-03-21T12:54:00.000+02:00

Xan volta a súa aldea natal para despedirse de aqueles que formaran parte importante da súa vida...

Hoxe comeza a funcionar este blog adicado a facilitar, aos seus visitantes, información sobre o novo proxecto audiovisual de Contacontos Producciones Cinematográficas: Xan, a despedida. Baixo este suxerente título atopamos unha curtamentraxe de 12 minutos, gravada na aldea de Toutón (Concello de Mondariz) e protagonizada por Marcos Correa, Xulio Abonjo, Jose María Tanas, Vanesa Sotelo e Marta Villar.

Dende agora, neste blog, poderedes seguir as novidades relacionadas co que será, sen dúbida, unha das curtametraxes máis premiadas dos vindeiros anos. Sexan todos benvidos a este novo espacio na rede adicado ao cine.